سلام الله عليكم عساكم بألف خير،
الإلتزام بالعادات شئ بياخد وقت مننا حسب عزيمة وإصرار كل شخص، والجانب الدينى من أهم الجوانب الحياتية وناس كتير بتغفل عنه بس لو إنتى قررتى تلتزمى يبقى تابعى المقالة للآخر ⬇️
فى البداية لابُد من “إستحضار النية” بالتقرب إلى الله عز وجل .
إيه هى أفضل طريقة للإلتزام ؟
الخطوة الأولى : “التدوين 📒✏️”
إستخدمى بلانر أو نوت بوك أو حتى كشكول وزيّنيه بالواشى تيب والألوان عشان يحفزك تدوّنى كل حاجة ومتنسيش، خلى قسم خاص للعادات الدينية فى صفحة لوحدها أو مجموعة صفحات ورا بعض بحيث تكون واضحة .
الخطوة الثانية : حصر وكتابة العادات و العبادات الدينية زى :
صلاة الفروض .
صلاة السُّنن .
صلاة الضُحى .
قيام الليل .
الدعاء .
الصدقة .
قراءة سورة الكهف كل جُمعة .
وِرد القرآن اليومى .
وِرد التسبيح والصلاة على النبى .
أذكار الصباح والمساء والنوم.
قراءة سورة الملك قبل النوم .
متابعة فيديوهات دينية .
الخطوة الثالثة : عمل جدول ومواعيد ثابتة لكل ما تم حصره وكتابته، وده هيساعدك فى الإلتزام أكتر وبعدين تلقائى هتلاقى نفسك فى المواعيد دى قايمة تصلى أو تسبحى مثلا وهكذا .
الخطوة الرابعة : خلى ليكى تقييم آخر الإسبوع وشوفى الجدول إتملى بنسبة كام فى المائه وإيه اللى قصرتى فى وداومى عليه الإسبوع اللى وراه .
الخطوة الخامسة : إعداد ركن للصلاة والطاعات فى المنزل ودى فكرة جميلة جداً ومؤثرة .
الخطوة السادسة : كافئى نفسك بمصحف جديد، مسبحة جديدة، سجادة صلاة، أو أى حاجة تحفزك على الإلتزام .
“هنيئاً لمن عوّد نفسه على الطاعات وإستزاد منها”