الوقت من أهم العوامل اللى محتاجين نستغلها صح عشان نوصل لأهدافنا، فى الوقت الحالى السوشيال ميديا بقت بتهدر وقتنا بشكل عجيب ونُصاب بالإحباط فى آخر اليوم عشان مأنجزناش أى حاجة من مهامنا اللى خططناها فى البلانر أو النوت بوك، الحل فى المقالة دى تابعوها للآخر :
إيه علاقة التخطيط بتنظيم الوقت؟
التخطيط من أهم العوامل اللى بتساعد فى تنظيم الوقت وعن طريقه بنوفر وقت وجهد كبير.
هل فى تقنيات ممكن تساعدنى فى تنظيم الوقت؟
أكيد طبعاً التقنية الأفضل على الإطلاق هى البومودورو(Pomodoro Technique) وإتكلمنا عنها بإستفاضة فى المقالة السابقة .
نيجى لأهم سؤال :
إزاى أخطط لوقتى فى البلانر والنوت بوك؟
وأول خطوة هتعملوها فى التخطيط داخل البلانر إنكم هتحددوا ٣ حجات أساسية :
الهدف اللى هتشتغلوا عليه وإيه شكل النهاية اللى عايزين توصلولها .
المقومات اللى لازم تكون عندكم .
الساعة أو الوقت اللى هتنجزوا فى المهام المطلوبة .
الخطوة الثانية : تقسيم المهام هيندرج تحل قسمين ١) ضرورى ٢) مُهم
وتحت كل قسم منهم نحدد هل الأمر ده عاجل ولا غير عاجل بمعنى إن الضرورى العاجل له الأولوية عن باقى المهام وهو أول حاجة تتنفذ، والمهم الغير عاجل معناه إن الأمر المذكور ده مهم لكن ينفع يستنى لحد ما ننفذ الأهم منه، أما الأمور الترفيهية بنكتبها فى خانات لوحدها .
الخطوة الثالثة : تحديد التوقيت المناسب لتنفيذ المهام بالليل أو بالنهار حسب تركيز كل شخص، والأفضل تحديد ساعات معينة .
نصائح بتساعد على التخطيط وتنظيم الوقت :
إستخدام To do list فى حصر المهام والتأكيد على إتمامها .
إستخدام ستيكى نوتس للتذكير بالمهام وممكن تخصصوا ألوان لكل مهمة زى : تنظيف البيت، مذاكرة مادة معينة وهكذا .
سماع فيديو تحفيزى قبل تنفيذ المهام هيساعدكم أكتر على الإنجاز فى وقت أقل .
الإبتعاد قدر الإمكان عن المشتتات المُهدرة للوقت زى السوشيال ميديا خصوصاً وقت إنجاز المهام .
التخطيط لمهام اليوم التالى قبل النوم لإنكم هتكسلوا تخططوا فى نفس اليوم .
الموضوع محتاج صبر وإستمرار عشان يبقى عادة ثابته فى يومنا متيأسوش من البداية وداوموا على تنظيم وقتكم .
“كل عمل يتعرّض للإنقطاع يصبح أقل فاعلية وأطول إستغراقاً للوقت”