ناس كتير عايزين يحققوا أحلامهم ويوصلوا لهدفهم فى الحياة بس مش عارفين ياخدوا الخطوة الأولى، وناس أكتر مش عارفين يحددوا هما عايزين إيه لكن عندهم طاقة يشتغلوا على نفسهم كل اللى محتاجينه هو التوجيه، فى المقالة دى هنتكلم عن خطوات تعزيز الإنتاجية والتحفيز على العمل تابعوا المقالة للآخر :
يعنى إيه زيادة إنتاجية؟
إنتاج مُخرجات أكثر(مهام مُنفّذة) من نفس كمية المدخلات (مهام لازم تنفيذها) لإكتساب أكبر فائدة حول إنتاجية نظام مُعين (الوصول للهدف).
ليه محتاجين لزيادة الإنتاجية؟
عشان نكتسب مهارات وأشياء جديدة مع مرور الوقت أو إكتساب المال حسب الهدف المُحدد .
ليه زيادة الإنتاجية مُهمة؟
لإن كل هدف موجود فى حياتكم بيساعدكم تصحوا كل يوم الصبح وعندكم عزم على تحقيقه والسعى ناحية كل شئ بيمنحكم الطاقة والتركيز والقناعة بالوصول .
بعد ما إتكلمنا عن التخطيط وتنظيم الوقت فى المقالات اللى فاتت ييجى دور التنفيذ !
الخطوة الأولى : كتابة المهام اللازم تنفيذها كاملة فى “To do list” .
الخطوة الثانية : إعادة التفكير فى قائمة المهام المكتوبة، لازم تفرقوا بين المهام اللى ليها أولوية إنكم تشتغلوا عليها حتى لو كانت صعبة وتستبعدوا المهام اللى ينفع تتأجل، المرونة ضرورية فى إختيار الهدف والمهام وطريقة التنفيذ .
الخطوة الثالثة : تنفيذ المهام الصعبة أولاً ثم الأسهل فالأسهل، وده لسبب إن المهمة الصعبة لما تخلص وانتوا لسه بادئين وذهنكم صافى هتقدروا تكملوا للآخر عكس لما تبدأوا بالسهل وتخلصوه هتستتقلوا الصعب وهيحصل تسويف .
الخطوة الرابعة : إكمال المهام على دُفعات متفرقة، لو عندكم مهمة قسموها على اليوم كله أو على أيام لو هتاخد وقت ده هيساعد إنها تتم بدون ملل، فمثلاً السفينة حجمها ضخم وصانع السفينة مبيخلصهاش فى يوم واحد ده مستحيل، بيبتدى كل يوم يحط مجموعة خشب جنب بعض لحد ما تتكون السفينة وبتنتهى بالشكل اللى بنشوفها عليه .
الخطوة الخامسة : الأكل الصحى، الإنسان بيعمل مجهود ذهنى وبدنى ولازم يهتم بالأكل الصحى عشان ذهنه يبقى حاضر وميحسش بصداع وألم ويتشتت طول الوقت وميعتمدش فى تركيزه على الكافيين (القهوة، الشاى، النسكافيه) لإن ده بيضرجداً بالصحة على المدى البعيد وأحياناً على المدى القريب .
الخطوة السادسة : وضع قائمة بالنتائج الحاسمة طوال اليوم، وده شئ مُحفّز هيساعد على الإستمرار ويبقى مَرجع عشان تعرفوا إيه اللى خلص واللى لسه محتاج تكملة .
الخطوة السابعة : المكافأة، كافئوا نفسكم بمشاهدة فيلم، شوكولاتة، أى حاجة ممكن تبسطكم، النفس بتحب اللى يكافأها وده أكبر تحفيز ليها .
“لا يكون الإنسان عظيماً إلا إذا صمم على أن يكون كذلك”